Aah, ang sakit ng ulo ko! Bakit lahat na lang ng bagay eh tumataas ang presyo! Gasolina, tumataas. Tinapay, tumataas din. Bigas, lalo na. Pati ba naman semento!? Naku, eh paano na yung mga makukulit na bata na inabisuhan ni lola na huwag maglambitin sa puno ng aratiles at nabalian ng braso dahil hindi siya nakinig kay grandma. Paano pa masesemento ang baling braso nila? Paano pa sila gagaling? Paano pa nila matutupad ang pag-asa sa kabataan? Tunghayan natin ito sa susunod na kabanata ng…Pira-pirasong braso. Hehehe.

Pero sa mga panahong ganito, nanaisin mo na tumira na lang sa Mars para lang makaiwas sa lahat ng sakit ng ulo. Kaya lang sa Mars, walang maiinom na tubig so wala ka rin choice. Ang bumababa na lang yata ngayon eh satisfaction rating ni Gloria Arroyo. Pustahan tayo, pagtagal-tagal pa ng mga araw, dalawang piso, tatlo na ang kokomban (ayon sa mga bata) sa mga suking tindahan at tataas din ang “Via Air Mail” na sobreng ginagamit mo sa tuwing susulat ka sa penpal mo sa Burundi. Hehehe.

Pero sa kabila ng mga krisis, nakukuha pa rin natin mag-hapi hapi. Nandiyan na lang ang tita ko na nagyaya mag-swimming pero wala pang lugar na pupuntahan. Basta nagyaya lang at bahala na ang tadhana kung saan kami papasyal. Hay naku ah, eh paano kung nataon na tulog si Tadhana kapag kinonsulta niyo siya kung saan dapat pumunta? Tita, ayusin mo yan. Ayusin mo buhay mo (mura lang naman ang pang-welding. Hahaha)

At noong isang araw lang, may kapitbahay kami na nagkaroon ng party sa kanilang bahay. At kung pilosopo ka, oo sa loob ng bahay siya nagpa-party dahil parang barn ng Chicken Run ang bakanteng lote na nakapaligid sa bahay nila dahil sa dami ng inaalagaan niyang panabong. Kung baga sa boksing, para siyang si Freddie Roach ng mga manok. Hmm, I wonder kung pangarap din niya makasama sa commercial ng San Miguel Beer…or Thunderbird Fruit Juices (Huh, meron nito? Hehehe)

At kung inaakala niyo na hanggang MMA at gripuhan lang ang tinuturo niya, ewan ko ba kung tinuturuan din niya kumanta ang mga ito dahil kapag tumilaok sila ng sabay-sabay eh parang nagbe-blending yung mga boses nila. Meron tenor, bass, alto, soprano 1, soprano 2, maricel soprano, eli soprano at kung ano pang boses ang tinuturo sa napaka-conservative na Conservatory of Music at Center for Pop (ay, puro birit lang pala dito. Hehehe).

Pero hindi yung mga manok niya ang ikukwento ko. Aba, hindi naman extension ng Ating Alamin at Tukaan ang blog ko (although kung may padulas, pwedeng-pwede. Ok na sa akin ang ilang biik na palalakihin ko at pera din yun. Hehe). Lalo naman hindi ito Animal Planet at National Geographic, anez? Although, masabi ko lang na pwede na ipang-adobo yung ilan sa mga manok ni neighbor dahil parang naka-steroids na sa laki. Hehe.

So ayun, mabalik ako sa party nila. Sabi ko nga, kahit mahirap ang buhay, nakukuha pa rin natin magsaya at tumawa. Hahahaha, hahahaha, hahahaha, hahahaha, hahahahaha, HAHAHAHAHAHAAAAAA! Aba, kailangan nga naman natin makalimutan ang mga pasakit sa ating balikat paminsan-minsan. At wala nang gagandang pang paraan upang makalimot sa pamamagitan ng videoke.

Noong gabing iyon, ewan ko lang kung nalipat ang Aliw Theater sa tabi ng bahay naming dahil walang tigil sila kumanta mula early evening hanggang magu-umaga na yata. Gusto ko sana bumili ng tiket para makapasok sa concert nila pero nagkasya na ako sa pakikisabay sa mga kinakanta nila kapag alam ko. Yuck, ang jologs ko. Walang pambili ng Magic Sing. Hahahaha.

Sa totoo lang, parang hindi sila sabay-sabay na kumakanta noong una. Pero noong may nag-input ng number ng “Beautiful Girl” ni Jose Mari Chan, nagmistulang Healing Rally ang kanilang party at taos-puso (at paos-boses) nilang kinakanta ang awit na ito na aaminin ko eh isa sa mga favorite songs ko noong toddler pa ako at mahilig pa ako sa Carnation Condensada na palaman sa tinapay (at laging korteng flower ang paglagay ko ng palaman. Hehehe)

At para maramdaman niyo naman ang concert nila, heto ang excerpt ng lead singer nila noong “Beautiful Girl” na ang kinakanta nila: “Butipol Gel, wereber you are (Come on, sing with me. Oo may ganito siyang banat.), I knows dat I see you, You might upen dador (as in, magkakonekta ang pagkakakanta niya ng “the door”). I knows dat I lab agen after a longest while, I love you again.

Mukhang nagapi siya ng alcohol na iniinom niya ah. Pero gaano man nakakaaliw ang kanyang lyrics, isang realization ng iniwan niya sa akin: Nyeta, volume 3 na pala ng SOGOH (Scene of Ganda Oh-peratevs!). At promise, dito lang patungo ang entry na ito. Grabe yung koneksyon ano? Mapapakanta ka ng “From A Distance” ni Bette Midler. Hehehe.

21. Refrigerator Magnet na maganda – Siya yung magandang someone na lalong gumaganda sa paningin mo habang mas madalas kayong magkadikit o magkasama sa isa’t isa. Kung baga, nasasanay ka lang makita ang fez niya kaya at the back of your mind, kung saan man ang likod na ito, eh maganda na siya para sa iyo. Kaya para sa mga desperado maging maganda, dikit lang kayo sa crush niyo lagi at any any eh nanakawan ka na lang niya ng halik. Hehehe

22. Dyologs na maganda – Mas maganda siya kapag mas marami siyang burloloy kaysa sa dashboard ng mga jeep na biyaheng Angono o Montalban. Pero naman, hindi maliliit na bote ng beer ang burloloy niya sa katawan ah. Basta, headband, hairband, broadband, marching band at kung anu-ano pang dekorasyon sa Christmas Tree…este, katawan. Isama mo na rin diyan ang kakaibang color combination ng damit niya at ang preference niya na kumain na nagkakamay. Kung ituturo mo man ang color wheel sa mga bata, sapat na siyang visual aid.

23. Maribeth Bicharang maganda – No, hindi naman kailangan na miyembro siya ng VIP Dancers (na bumubuhat kay Vilma Santos sa variety show niya noon na katapat ng The Sharon Cuneta Show) para maging maganda ka. Simple lang ang premise nito. Hindi ba nagagandahan tayo sa mga girlash na malupit sumayaw. Tignan mo na lang ang EB Babes. Oo maganda na sila in base form pero kapag gumiling na sila, nagmimistula na lang asong ulul yung mga tambay sa labasan na umiinom ng Vino Kulafu kahit tanghaling tapat. Ulitimong kickball change pa lang niya, pamatay na. Hehehe.

24. Gandang Ricky Reyes – Ito naman yung gumanda noong naayusan na ang buhok niya at na milk bath na ang epidermis niya. Aminin man natin o hindi pero malaking bagay para sa OKRA (o Overall Kagandahan Rating) ng isang merla bautista ang buhok. Minsan, kahit parang priority project ng DPWH ang mukha niya pero maganda ang hair niya eh keri pa rin. At nga pala, may dalawang sub-classes pa ang number na ito: ang napaganda sa Ricky Reyes Salon at ang napaganda sa Beauty School Plus. Ano ang pinagkaiba nila? Wala naman gaano pero yung mga napaganda sa Beauty School Plus eh tinatawag na “finished product” ni Mama Ricky. Hehehe. At gaya nga ng sabi ni Mama Ricky, “Aung Gunduh!”

25. Maganda kapag nakatalikod – Talagang madadala ang mata mo sa katitingin sa kanya dahil ibang klase ang curves niya at maganda ang kutis niya. Pero, ang catch, nakatalikod pa lang siya sa lagay nay an. So kung bibigyan man natin siya ng OKRA, perfect na niya ang 50% for kagandahan ng likod. Pero, kapag nilipad na ang peluka niya at humarap siya sa iyo para kunin, matatanung mo sa kanya kung sa anung “Shake, Rattle and Roll” siya naging extra. Basta, hindi mo maalala kung anung numero siya lumabas pero alam mong hinding-hindi siya mapapalampas pagdating sa casting ng mga extrang mamaw. Hehehe.

26. Maganda sa uniporme – Kagaya ng blog entry na pinaggayahan ko nito (oo, yung kay Somayyah Sarip Abdullah nga. Hehehe), may mga babae na gumaganda kapag suot na nila ang malilinis nilang school uniform. Siyempre, may advantage dito ang mga kumukuha ng medical courses tulad ng Nursing, Med Tech, Medicine at kung anu-ano pa. To explain it simply, parang ang bango at ang ganda nilang tignan dahil sa kalinisan ng kanilang anyo. At dahil dito, maraming brand ng sabong panlaba ang naglalaban-laban sa mga korte para sa kanila ipangalan ang kategoryang ito.

27. Alay lakad Kagandahan – Sila naman yung gumaganda dahil sa perfect poise nila sa tuwing naglalakad sila. Kahit sa mall o sa talipapa man siya nandoon, angat pa rin talaga sa iba ang kanyang lakad na natutunan niya sa Cora Doloroso kaya marami pa rin ang nagkakagusto sa kanya. At yun nga, kapag may alay lakad ang organisasyon niyo, isama niyo siya at tiyak maraming sasama. Well, physically hindi siya magandang-maganda pero hindi naman siya “Sana, lakad ka na lang” type of a girl. Hehe.

28. Pilita Corrales na kagandahan – Hindi ito yung category para sa mga maganda dahil maraming asawa, ok? Ano ba, tanga ka? Hindi ka ba naman mai-in love sa isang babae na may golden voice kapag kumanta? Yun tipong mapa-Mariah Carey o Johnny Cash man ang kanta eh kayang-kaya niya. Siyempre, may extra points ang OKRA niya kapag marunong siyang lumiyad nang hindi nababali ang spinal column niya kahit hindi siya uminom ng Anlene. Oh di ba, nakakaantig ng puso yung kada umaga eh pakanta niyang sinasabi ang “Honey, narito na ang almusal mo (almusal!). Kainin mo bago lumamig ito-ho hoh!”

29. Magandang Gabi Bayan – Hindi siya yung magandang kamukha ni Noli De Castro (na sa dami pa lang ng grasa sa buhok niya eh solb na ang problema natin sa langis. Hehehe). Ito yung mga girls na for some strange reason eh gumaganda kapag gabi na. May mga certain features ng kanyang anyo ang naha-highlight kapag gabi na at may naitatago din naman. At kung may-ari ka ng mall, huwag mo siyang kunin na Security Guard tuwing night shift dahil kasasara pa lang ng mall eh marami na ang nakapila bago ito bumukas.

30. Gandis Aketch/ Magandang KGB (or Kung Gabi Bakla) – Mga veklah, iterla mae na ang category para sa inyey. Gora na ang ganders mo sa category na itech dahil aminin natin sa hindi, meron mga badaf na mas maganda pa sa mga tunay na babae. Tignan mo na lang yung mga sumasali sa Super Si Reyna noon. Teka, nasaan na ba yung mga recorded VHS tapes ko nun, hahanapin ko lang ah…Ang alam ko nasa…ay, naibenta ko na pala kay Mother Superior ang mga tapes. Ah basta, keribels mo itey? Gandis aketch, witchelsea marie quoda!

Haay, sampung bagong category ng kagandahan na naman. Pero, hindi pa dito natatapos ang lahat kaya huwag muna kayong kumanta ng “Let There Be Peace on Earth” kapag die-hard That’s Entertainment! fan ka ha. May mga susunod pang kabanata kaya ang gawin mo na lang eh abangan ito. Pero, habang naga-abang ka, may gawin ka naman sanang productive,hindi lang yung nakatingin ka sa monitor. Hehehe.

Babushka Major (at nyeta, ang daldal ko. Hahaha)